Leita
Fornleifaskóli barnanna er verkefni sem Fornleifastofnun Íslands hefur tekið þátt í undanfarin þrjú ár ásamt samstarfsaðilum úr Litlulaugaskóla í Reykjadal, Hinu þingeyska fornleifafélagi og fornleifafræðingum við Hunter og Brooklyn Háskóla í New York.
Á vegum Fornleifaskólans voru nú á haustdögum haldnir fornleifafræðilegir þemadagar í Litlulaugaskóla en það er í annað sinn sem slíkir dagar eru haldnir við skólann. Líkt og í fyrra skiptið var það Dr. Sophia Perdikaris, fornleifafræðingur við Brooklyn Háskóla, sem stýrði verkefninu en henni til aðstoðar var Þóra Pétursdóttir starfsmaður Fornleifastofnunar Íslands. Auk þess voru fornleifafræðingarnir Dr. Edith Gonzalez de Scollard frá New York, og Dr. Reginald Murphy frá Antigua, komin til þess að taka þátt í kennslunni og kynna aðstandendum Fornleifaskólans sambærilega starfsemi í sínum heimahögum. Þemadagarnir tókust ljómandi vel og voru börn og leiðbeinendur ánægðir með útkomuna. Meðal verkefna sem nemendur spreyttu sig á var steináhaldasmíði úr hrafntinnu, vinnsla fjaðurpenna úr gæsafjöðrum og ítarleg rannsókn á ugluælu.
Fornleifaskólinn er orðinn að föstum lið í starfsemi Litlulaugaskóla og notaði Sophia Perdikaris tækifærið á þemadögum og afhenti skólanum rausnarlega gjöf sem ætlað er að gera starfið auðveldara og skemmtilegra. Gjöfin innihélt sex GPS staðsetningartæki, sex myndavélar og eina upptökuvél. Með þennan tækjabúnað að vopni geta nemendur og kennarar ráðist í skráningaverkefni tengd þeim fjölmörgu fornminjum sem finna má í nágrenni skólans í samvinnu við heimildamenn á svæðinu. Slík verkefni má með skemmtilegum hætti tvinna saman við sögu-, grenndar- og samfélagsfræðslu í skólanum, auk þess sem það gefur nenemdum kost á að kynnast rannsóknarvinnu.Nánar má lesa um þemadagana á heimasíðu Litlulaugaskóla. Sérstök heimasíða Fornleifaskóla barnanna opnar innan skamms á veffanginu www.fornleifaskoli.is þar sem hægt verður að fylgjast með verkefninu og fræðast nánar um það.