Verkefni Fornleifastofnunar og Hins þingeyska fornleifafélags eru komin í fullan gang og er megnið af starfsfólki Fornleifastofnunar að störfum í Suður-Þingeyjarsýslu um þessar mundir. Uppgraftarteymi hefur þegar fundið hrosskuml við áframhaldandi rannsóknir á kumlateig á Litlu-Núpum og má lesa um framgang uppgraftarins á undirsíðunni Fréttabréf úr felti.

Í sumar gefst ferðafólki og heimamönnum á Norðausturlandi einstakt tækifæri til að fræðast nánar um þær fornleifarannsóknir sem nú standa yfir í Suður-Þingeyjarsýslu. Hafin er fimm vikna dagskrá þar sem Fornleifastofnun Íslands og Hið þingeyska fornleifafélag bjóða áhugasömum að heimsækja fornleifafræðinga á vettvangi og fræðast um störf þeirra og þau verkefni sem Fornleifastofnun og Hið þingeyska fornleifafélag standa að. Þegar hefur farið fram kynning á skráningu í Seljadal. Næsta kynning er fyrirhuguð á Litlu-Núpum þann 1. júlí næstkomandi. Á heimasíðu Hins þingeyska fornleifafélags er hægt að lesa um kynninguna í Seljadal og fá frekari upplýsingar um næstu kynningar.