Síðastliðinn föstudag var tilkynnt um tilnefningar til Menningarverðlauna DV í 31. sinn og kom þá í ljós að rannsókn Fornleifastofnunar á Hofstöðum í Suður-Þingeyjarsýslu og nýútkomin bók um verkefnið hlýtur tilnefningu til verðlaunanna í flokknum Fræði. 

Í umsögn blaðsins um verkefnið segir m.a.:
Í áratug var grafið þar [á Hofstöðum] af mikilli nákvæmni og nú í árslok 2009 komu niðurstöðurnar út í mjög vandaðri skýrslu á ensku, en með langri íslenskri samantekt í lokin. Auk þess sem þessi rannsókn var í sjálfu sér afar vönduð fræðilega hefur hún skilað að mörgu leyti nýjum og nýstárlegum niðurstöðum um byggð á Íslandi á landnámsöld.

Verðlaunin verða afhent í Iðnó miðvikudaginn 10. mars. Þau eru veitt fyrir átta flokka - bókmenntir, byggingarlist, fræði, hönnun, kvikmyndalist, leiklist, myndlist og tónlist – og eru fyrir framúrskarandi árangur á hverju sviði. Til gamans má geta að almenningur getur kosið um hver hlýtur sérstök netverðlaun á slóðinni http://www.dv.is/kosningar/menningarverdlaun-2010/.