Tilkynnt hefur verið um tilnefningar til Nýsköpunarverðlauna forseta Íslands fyrir árið 2009. Á meðal tilnefninga er verkefni Fornleifastofnunar: Fornleifar á eyðidal: skráning og kynning á fornum minjum í Seljadal. Verkefnið var unnið fyrir stofnunina síðastliðið sumar af Ástu Hermannsdóttur, fornleifafræðinema á öðru ári við Háskóla Íslands.

 

Verkefnið hlaut styrk Nýsköpunarsjóðs námsmanna síðasta vor og fólst í fornleifaskráningu á Seljadal í Suður-Þingeyjarsýslu og þróun aðferða við miðlun menningarsögulegra upplýsinga. Verkefnið var jafnframt unnið í samvinnu við Hið þingeyska fornleifafélag, sem hefur verið í fararbroddi rannsókna og kynningar á fornleifum á svæðinu á síðustu árum. Markmið verkefnisins var að nýta niðurstöður fornleifaskráningar til að auka menningartengda ferðaþjónustu og vann Ásta m.a. að þróun hugmynda um hvernig hagnýta mætti fornleifar á Seljadal til kynningar fyrir bæði heimamenn og ferðafólk. Ein þeirra leiða sem skoðuð var er útfærsla á hugmyndum um göngu- og minjakort um Seljadal þar sem tvinnaðar væru saman upplifun náttúru, menningarlandslags og fræðslu.

 

Nýsköpunarverðlaun forseta Íslands eru árlega veitt þeim námsmönnum sem “hafa unnið framúrskarandi starf við úrlausn verkefnis sem styrkt var af Nýsköpunarsjóði námsmanna” og er Ásta vel að tilnefningunni komin. Verðlaunin verða veitt á Bessastöðum þann 2. mars næstkomandi.